أخبار وطنية زلزال كبير الي صار اليوم في تونس... بقلم سامي بن سلامة
نشر في 22 سبتمبر 2021 (20:15)
بقلم سامي بن سلامة- العضو السابق في الهيئة العليا المستقلة للانتخابات والمنسق العام لمنظمة 10-23 لدعم مسار الانتقال الديمقراطي
هو زلزال كبير الي صار اليوم في تونس... ومع أنو ما فماش معطيات باستثناء الي وردت في البلاغ الجاف الصادر على رئاسة الجمهورية...
لكن أهم ما فمة هو الإلغاء التام لأبواب كاملة من دستور 2014... نص البلاغ دقيق جدا من الناحية هاذي وانجموا نبنيو عليه ونحاولو نفهمو...
الحاجة الأولى أنو تم التنصيص صراحة على الإبقاء على التوطئة وزوز أبواب فقط من دستور 2014 وهوما:
الباب الأول المتعلق بالمبادئ العامة
الباب الثاني المتعلق بالحقوق والحريات...
الباقي ألغي... وهاو علاش...
الباقي الكل حسب فهمي الخاص ألغي وحتى حد ما ينجم يحتج بيه أو يستعملو غير رئيس الجمهورية...
وهي سياسيا خطوة ذكية لأنو أي واحد يجبد أي فصل باش يجاوبو حسب الظرفية....ألغي... وإلا كان يساعد مخططات الرئيس... ما زال صالح....
وهذا يمكنو من استعمال بعض الأحكام منو وقت يظهرلو... ما لم يتعارض مع التدابير الاستثنائية... وهاذي حطها في البلاغ...
وباش تكون الصورة أوضح...
هاذي الأبواب الي تم إلغاءها باش تفهمو الموضوع مليح مليح:
الباب الثالث المتعلق بالسلطة التشريعية
الباب الرابع المتعلق بالسلطة التنفيذية
الباب الخامس المتعلق بالسلطة القضائية
الباب السادس المتعلق بالهيئات الدستورية المستقلة
الباب السابع المتعلق بالسلطة المحلية
الباب الثامن المتعلق بتعديل الدستور
الباب التاسع المتعلق بالأحكام الختامية
الباب العاشر المتعلق بالأحكام الانتقالية
علاش نقول تم إلغاءها لأنو ما قالش مواصلة العمل بيها كيفما تم الأمر بالنسبة للباب الأول والثاني والتوطئة... يعني ضمنيا ما فماش مواصلة للعمل بيها...
اليوم الباب المتعلق بالسلطة القضائية ألغي واحتمال كبير ما عاد فمة لا مجلس أعلى للقضاء ولا غيرو...
وهذا مهم جدا ويخلي القضاة في موقف مواجهة مباشرة مع الرئيس...
الباقي تنجمو تفهموه وحدكم...
الإجراءات هاذي ما انجم أنا واحد من الناس نقول باهية وإلا مخطرة الما ما نشوف نص الأمر الرئاسي ونشوف التطبيق...
وعلى كل نهار مشوم على برشه ناس...والسلام ثلاثا
